Kua ta e síntomanan di trich?

Hopi hende muhé ku trich lo no sinti ningun síntoma, i mayoria hende hòmber lo no tin ningun síntoma mes. En general, mas òf ménos 70% di esnan infektá lo no sinti ningun síntoma.

Esnan ku si tin síntoma lo no sinti esakinan te despues di un luna òf mas ku nan a haña e infekshon. Portadó di manera asintomátiko ta wòrdu mirá ku frekuentemente i por persistí pa añanan.

Pa hende muhé e síntomanan por ta:

• Un kaso típiko ta un deskargo vaginal di koló gel/bèrdè ku blasnan ku tin un holó fresku manera piska.
  
• Grawatashi, kimamentu, kòrá òf doló na e área genital (di vagina)
  
• Doló ora ta oriná
  
• Doló durante òf despues di tene relashon
  
  

Pa hende hòmber e síntomanan por ta:

• Fluho (friu) òf líkido ku ta sali for di pénis
  
• Sintimentu di kimamentu durante/despues di oriná òf un ehakulashon (ku bini)
• Grawatashi òf iritashon den e pénis

Ta importante menshoná ku e síntomanan akí serka hende hòmber hopi biaha ta kousá pa otro infekshon manera Chlamydia i Gonorea.

Si e resultado ta negativo pa Chlamydia, Gonorea òf Mycoplasma, Trichomonas mester wòrdu ekskluí.

Kon mi por haña trich?

Por pega otro ku trich via di vaginal. Tambe por pasa esaki pa otro hende ora usa artefakto seksual no labá. Pero no ta komun pa e parasit afektá otro parti di kurpa manera boka òf ano.

E por plama di pénis pa vagina, di vagina pa pénis i for di vagina pa vagina.

Si bo ta na estado i bo tin trich, ta masha importante pa bo sigui un tratamentu promé ku bo duna lus, pa bo no kore e riesgo di infektá bo bebi durante di parto.

Muhénan estado ku Trichonomaniasi no tratá tin mas probabilidat pa nan yu nase muchu tempran i e yunan tin mas probabilidat pa nase ku un peso abou (menos ku 5.5 liber).

Kon mi por sa ku mi tin trich?

Un tèst pa diagnostiká trich ta fásil i sin doló. Pa hende hòmber, ta usa un swab di uretra òf simpel tèst di urina pa por diagnostiká, i pa hende muhé ta usa un swab pa tuma un muestra di e baba vaginal òf cervix.

Por yama òf manda nos un mensahe pa sa mas tokante di kon simpel ta pa hasi e tèst.

Trich ta difísil pa trata?

Trich por wòrdu trata fásil i eksitosamente ku antibiotiko. Aunke tin muhénan ku tin un infekshon persistente no opstante terapia adekuá.

Mi pareha tambe lo mester tèst?

Si a diagnostiká trich serka bo, bo pareha(nan) aktual tambe mester tèst i sigui un tratamentu.

Aktividat seksual ta deskonsehá te 7 dia despues ku a kuminsá ku bo tratamentu òf komo mínimo despues di start e tratamentu di bo partner(nan) seksual aktual. Si esaki no ta posibel, usa kondon.

Kiko ta pasa si no trata trich?

Sin tratamentu, trich por keda aktivo pa vários luna i asta aña.

Aunke no ta masha komun ku trich por duna komplikashon serio, serka hende muhé na estado e por kondusí na duna lus prematuro i ta nase ku un peso abou.

Si no trata trich ta hisa e riesgo di haña otro tipo di STD, inkluso HIV.

Kon mi mes por evitá di haña trich (atrobe)?

Usa kondon (na e manera korekto) kada bes ku bo tene relashon seksual ta e mihó manera pa evitá di haña trich òf di pasa esaki pa un otro hende.

E mihó idea ta pa abo i bo pareha, sea ku ta un relashon nobo òf un relashon di durashon largu ku un pareha so, hasi un tèst promé ku tene relashon sin protekshon.