Kua ta e síntomanan di Gonorea?

E averahe di tempu promé ku haña sintoma ta 5 dia, pero e por varia entre 2 dia i 3 siman despues di tene relashon seksual.

Hende muhé mayoria biaha lo no sinti ningun síntoma. Si kisas nan sinti algun síntoma mes, fásilmente, por konfundí e síntomanan akí ku un infekshon di blas di orina.

Pa hende muhé e síntomanan por ta:

• Doló òf sensashon di kimamentu ora ta oriná
  
• Sangramentu entre e periodonan di menstruashon
  
• Kambio den e fluho vaginal (friu) di kustumber, mayoria kaso tin mas fluho vaginal
• Grawatashi na ano, fluho anal of sintimentu menos dushi
  
  

Pa hende hòmber e síntomanan por ta:

• Fluho (friu) òf líkido ku ta sali for di kabes di penis
  
• Doló òf kimamentu ora ta oriná
  
• Testíkulo ku ta hasi doló òf ta hinchá (un so òf tur dos)
• Grawatashi na ano, fluho anal of sintimentu menos dushi
  

Normalmente infekshon na garganta òf ano no ta notabel.

Kon mi por haña Gonorea?

Por pega otro ku gonorea na momento ku tin sèks oral, vaginal òf anal sin protekshon. E por sosodé tambe via di kontakto di boka ku ano i uso di artefakto seksual no labá.

Meskos ku den kaso di chlamydia, un mama tambe por pasa gonorea pa su yu na momento di duna lus.

Si bo ta na estado i bo ta sospechá ku bo tin gonorea, ta importante pa bo laga hasi un tèst i sigui un tratamentu mas lihé posibel pa evitá kualke problema di salú pa bo bebi.

Kon mi por haña sa ku mi tin Gonorea?

Normalmente, ku un simpel tèst di orina of serka un hende muhe cervical swab ku sea e mes òf su dòkter tuma.

Den kaso ku bo tabatin sèks oral òf anal sin protekshon, mester hasi un tèst unda ta usa un swab pa kolektá un muestra for di garganta òf ano. Esaki no ta hasi dolo.

Un persona mes por tuma e swab na rektum tambe. Den sierto kaso lo por tuma un muestra for di e hende hòmber su kanal di orina.

Yama òf manda nos un mensahe pa haña kontesta riba kualke pregunta ku bo por tin tokante di tèstmentu.

Ta difísil pa trata Gonorea?

Gonorea ta un infekshon ku por trata ku un antibiótiko. Dor di porsentahenan hopi haltu di resistensia pa remedinan pa bebe, e tratamentu mas apropiá ta un inyekshon intremaskular (Ceftriaxon).

Esaki ta nifiká ku bo dòkter lo inyektá bo na bo brasa. Lo e no hasi doló paso bo ta haña kalmante pa doló.

Ta importante pa laga tèst i sigui un tratamentu mas lihé posibel. Konsultá un dòkter si despues di algun dia ku a kuminsá ku e tratamentu e síntomanan tei ainda.

Mi pareha tambe lo mester tèst?

Si a diagnostiká bo ku kualke STD, bo pareha(nan) aktual tambe lo mester hasi un tèst i sigui un tratamentu. Ta importante pa tur hende ku bo tabatin kontakto seksual kuné resientemente hasi un tèst.

No tene relashon seksual ku bo pareha promé ku el a tèst, komo ku bo ta kore riesgo di haña e infekshon atrobe.

Bo mester warda mínimo 7 dia despues di a kuminsá ku bo tratamentu òf sikiera despues di a kuminsá e tratamentu di bo pareha(nan) aktual. Si esaki no ta posibel usa kondon òf “beflap”.

Kiko ta pasa si no trata Gonorea?

Si no trata gonorea, e por kousa problema serio di salú ku por tin efekto ku ta dura largu.

Serka hende muhé e infekshon por plama den barika, e tubunan uterino (transportadó di webu) i ovario, kousando un enfermedat kaminda e hep ta inflamá .

E inflamashon aki, konsekuentemente, por oumentá e riesgo di infertilidat i embaraso ektópiko (un embaraso ku e yu ta pafó di e matris, normalmente den un di e tubunan uterino).

Serka hende hòmber, e infekshon por plama di e uretra (kanal di orina) bai na e testíkulonan, kousando ku nan ta hincha i hasi doló (konosí tambe komo epididymo).

Tambe e por okashona prostatitis, un infekshon di prostat i si no trata esaki e lo por resulta ku e uretra ta sera parsialmente òf kompletamente.

Bo por bolbe infektá bo mes dor di transmití e bakteria for di bo genital, garganta òf anu na bo wowo, kousando conjunctivitis òf algu pihó, keratitis, si no trata esaki. 

Den sierto kasonan, e bakteria por plama den bo sirkulashon di sanger i kousa infekshon na otro órganonan, bo kurason, valves, wesu, artikulashon èts.

I bo por desaroyá un perihepatitis, kaminda e batí di e pulmon ta infektá, i ta hasi doló parti ariba di bo barika i grip. 

Si no trata gonorea e chèns di haña HIV òf di infektá otro hende ku HIV por oumentá.

Kon mi mes por evitá di haña Gonorea (atrobe)?

Usa kondon (na e manera korekto) kada bes ku bo hasi sèks ta e mihó manera pa evitá di haña òf kontagiá otro hende ku gonorea.

Ta un bon idea pa abo i bo pareha tèst promé ku tene relashon sin protekshon, sea ku ta un relashon nobo òf un relashon di durashon largu ku un pareha so.