Kua ta e síntomanan di Chlamydia?

Bo por tin chlamydia sin nunka nota ku tin algu robes, komo ku mayoria hende ku tin chlamydia no ta sinti ningun síntoma.

Hende hòmber tin sintoma mas tantu ku un hende muhé.

Pa hende muhé e síntomanan por ta:

• Sangramentu na vagina despues di a tene relashon
  
• Sangramentu entre di e periodonan di menstruashon
  
• Kambio den e fluho vaginal kustumbrá
  
• Doló ora ta oriná òf durante tenementu di relashon
  
• Doló parti abou di barika
  
  

Pa hende hòmber e síntomanan por ta:

• Fluho ku ta sali for di kabes di penis
  
• Doló òf molèster ora ta oriná
  
• Molèster di tripa/diarea (ku por inkluí, doló, fluho di sleim òf sangramentu)
  
• Testíkulo ku ta hasi doló òf ta hinchá (un só òf tur dos)
  

Kon mi por haña Chlamydia?

Por pega otro ku infekshon di chlamydia via di sèks oral, vaginal òf anal. No mester tin spèrma pa plama e infekshon.

Por pasa chlamydia tambe ora usa artefakto seksual òf man no labá.

Ta posibel pa un mama pasa chlamydia pa su yu, na momento di duna lus.

Si bo ta na estado i bo tin chlamydia, ta masha importante pa bo hasi un tèst i sigui un tratamentu promé ku bo duna lus, pa asina evitá e riesgo di infektá bo bebi durante di parto.

Kon mi por sa ku mi tin Chlamydia?

E tèst pa detektá chlamydia ta fásil i sin doló. Pa hende hòmber, ta diagnostiká chlamydia ku un simpel muestra di orina.

Serka hende muhé ta usa un swab pa tuma un muestra di e baba vaginal. Por yama òf manda nos un mensahe pa sa mas tokante kon fásil ta pa laga hasi un tèst.

Ta difísil pa trata Chlamydia?

Infekshon di chlamydia ta fásil pa trata i kura ku uso di antibiótiko korekto, ku por ta sea un dósis so òf un kür di 7 dia.

Den mayoria kaso, no ta nesesario pa ripití e tèst pa wak si e infekshon a kita, pero bo dòkter lo bisa bo si esaki ta nesesario.

Mi pareha tambe lo mester tèst?

Si a diagnostiká bo ku chlamydia, bo pareha(nan) aktual ku bo ta sèks kuné tambe mester hasi un tèst i si ta nesesario sigui un tratamentu.

Mester warda 7 dia despues di a kuminsá ku e tratamentu promé ku tene relashon atrobe òf sikiera despues ku  bo pareha(nan) aktual a kuminsa ku e tratamentu.

Si esaki no ta posibel, usa kondon i/òf un “beflap”.

Kiko ta pasa si no trata Chlamydia?

Si no trata chlamydia, e por kousa problema serio di salú ku por tin efekto ku ta dura largu.

Serka hende muhé e infekshon por plama den barika, e tubunan uterino (transportadó di webu) i ovario, kousando un enfermedat kaminda e hep ta inflamá.

Inflamashon di e hep, konsekuentemente, por oumentá e riesgo di infertilidat i embaraso ektópiko (un embaraso ku e yu ta pafó di e matris, normalmente den un di e tubunan uterino). 

Serka hende hòmber, e infekshon por plama bai via di e uretra (kanal di orina) bai na e testíkulonan, kousando ku nan ta hincha i hasi doló (konosí tambe komo epididymitis).

Den kaso eksepshonal, chlamydia por plama bai den sanger (septicaemia) òf e skarnirnan i kousa un infekshon serio.

Si no trata chlamydia e chèns di haña HIV òf di infektá otro hende ku HIV por oumentá.

Kon mi mes por evitá di haña Chlamydia (atrobe)?

Usa kondon (na e manera korekto) kada bes ku bo hasi sèks ta e mihó manera pa evitá di haña òf kontagiá otro hende ku chlamydia.

Ta mihó pa abo i bo pareha tèst promé ku tene relashon sin protekshon, sea ku ta un relashon nobo òf un relashon di durashon largu ku un pareha so.