Kua ta e síntomanan di Mgen?

Ta posibel ku un hende hòmber òf hende muhé tin Mgen sin sinti ningun síntoma mes. Tambe tin otro infekshon ku por kousa hopi di e síntomanan ku ta sigui.

Pa hende muhé e síntomanan por ta:

• Sensashon di kimamentu ora ta oriná
• Sangramentu entre e periodonan
  
• Sangramentu despues di tene relashon 
  
• Kambio den e fluho vaginal (friu) di kustumber
  
• Doló òf molèster parti abou den barika
  
• Doló ora ta tende relashon seksual
  
  

Pa hende hòmber e síntomanan por ta:

• Fluho (friu) ku ta sali for di pénis
  
• Sensashon di kimamentu ora ta oriná
• Grawatashi, sensibilidat òf pénis hinchá
• Oumento di gangnan linfátiko den e gròin
• Doló durante relashon seksual òf ehakulashon
• Sanger den urina òf spèrma
  
  

Kon mi por haña Mgen?

Mgen ta pasa di un hende infektá pa un otro hende ora tene relashon seksual vaginal òf anal sin protekshon. Te ainda ta deskonosí si ta transmití Mgen ku sèks oral.

Kon mi por sa ku mi tin Mgen?

Por diagnostiká Mgen serka hende hòmber ku un tèst di orina, i serka hende muhé ta usa un swab pa tuma un muestra di e baba vaginal òf cervix.

Por yama òf manda nos un mensahe pa haña kontesta riba kualke pregunta ku bo por tin tokante tèstmentu.

Mgen ta difísil pa trata?

Por trata Mgen eksitosamente ku antibiótiko, aunke tin sierto tipo di Mgen ku ta resistente pa remedi loke ta hasi e tratamentu akí mas difísil.

E tratamentu ta konsistí di 5 te maksimalmente 10 dia bebe remedi (tablet/kápsula).Ta importante pa usa e antibiótikonan korekto i kaba tur remedi ku haña.

Konsultá bo dòkter si despues di algun dia ku a kaba ku e tratamentu ainda e síntomanan tei.

Bo dòkter por skohe pa bo  bolbe hasi tèst , pero esaki mester sosodé despues di 3 siman ku a kuminsá ku e tratamentu.

Mi pareha tambe lo mester tèst?

Si a diagnostiká Mgen serka bo, bo pareha(nan) aktual tambe lo mester hasi un tèst i sigui un tratamentu.

Ta rekomendabel pa no hasi sèks te ora ku abo i bo pareha a kaba ku boso tratamentu, i ku boso a haña resultado di e tèst. Si no ta posibel , usa kondon.

Kiko ta pasa si no trata Mgen?

Si no trata Mgen, e por kousa problema serio di salú .

Serka hende muhé e infekshon por plama den barika, e tubunan uterino (transportadó di webu) i ovario, kousando un enfermedat kaminda e hep ta inflamá.

E inflamashon, konsekuentemente, por oumentá e riesgo di infertilidat i embaraso ektópiko (un embaraso unda e yu ta krese pafó di e matris, normalmente den un di e tubunan uterino).

Tambe e por kousa cervicitis òf endrometritis.

Serka hende muhé na estado, Mgen por kousa parto prematuro i asta e por pèrdè e barika. Pero no tin sufisiente evidensia den e diferente estudionan ku a ser hasí.

Serka hende hòmber, uretritis por kondusí na restrikshonnan den bo uretra, kual ta nifiká ku bo tubu di urina lo por keda parshialmente òf kompletemente será.

E por kousa doló i hinchamentu i kondusí na proktitis i epididimitis.

Kon mi mes por evitá di haña Mycoplasma genitalium (atrobe)?

Usa kondon (na e manera korekto) kada bes ku bo tene relashon seksual ta e mihó manera pa evitá di haña Mgen òf di pasa esaki pa un otro hende.

Ta mihó idea pa abo i bo pareha sea ku ta un relashon nobo òf un relashon di durashon largu ku un pareha so, hasi un tèst promé ku tene relashon sin protekshon.